२८ पौष २०७८ सल्यानको बनगाड कुपिण्डे १ बनगाड खोलामा झोलुङ्गे पुल उद्घाटन गरिएको छ ।
बुधबार खारखेत मुहान माल्पे, खरेखोला जिउला जोड्ने झुलुङ्गे पुल को एक कार्यक्रमका बिच उद्घाटन गरिएको हो ।झोलुङ्गे पुलको उद्घाटन गर्दै कर्णाली प्रदेशका पूर्व आर्थिक मामिला तथा योजना मन्त्री प्रकाश ज्वालाले बिकासका कार्यमा राजनीतिक सहकार्यहुन जरुरी हुने बताएका छन् । नेकपा समाजवादीका उप महासचिव समेत रहेका ज्वालाले जिल्लाको बिकासका लागि आफुले सधै सकारात्मक भुमिकामा रहने बताए ।
यस्तै बनगाड कुपिण्डे नगरपालिकाका नगरप्रमुख गोबिन्द कुमार पुनले जनताको आवश्यकता लाई मध्यनजर गर्दै बिकासका चरणहरु वृद्धि हुँदै गएको बताए ।उनले बनगाड कुपिण्डे नगरपालिका भित्र भएको बिकास जनतामुखी भएको बताउदै झोलङ्गे पुल निर्माणले उक्त क्षेत्रका जनतालाई राहत भएको बताए ।पूर्वाधार विकास कार्यालय सल्यानको करिब ६६ लाख, स्थानीय निर्माण सामग्री १ लाख ४७ हजार र सामाजिक तथा प्राविधिक सहयोगका लागि गैर सरकारी संस्था शारदाको तर्फबाट ६ लाख १९ हजार गरी ७३ लाख ७९ हजार ५ सय ४९ रुपैयाँको लागतमा पुल निर्माण भएको उपभोक्ता समितिका अध्यक्ष डम्बर साहुले जानकारी दिए ।
१ सय मिटर लम्बाइ रहेको पुलको २०७६ माघमा सम्झौता भई २०७७ माघमा सम्पन्न भएको थियो ।पुल सञ्चालनमा आएसँगै ४ सय २० घरधुरीका करिब २ हजार एक सय जनसङ्ख्या लाभान्वित हुने अपेक्षा लिएको छ ।
